Yn Y Rhwydwaith Maethu, credwn y dylai pobl ifanc gael llais a chael cyfleoedd i wneud gwahaniaeth.
Yng Nghymru, nod ein bwrdd cynghori yw gwneud yn union hynny – mae arnom eisiau rhoi llais a chyfle i bobl ifanc sydd â phrofiad o ofal maeth ymgyrchu ar y materion sy’n bwysig iddyn’ nhw!
Mae ein bwrdd cynghori ieuenctid yng Nghymru yn agored i bobl ifanc 14-25 oed sydd mewn gofal maeth neu sydd wedi bod mewn gofal maeth.
Credwn y dylai pobl ifanc gael cyfleoedd i ddefnyddio’u llais ac y dylai’r gwaith a wnawn ganolbwyntio ar eu barnau a’u profiadau nhw. Mae arnom eisiau i’n holl raglenni, polisïau a’n gwaith ymgyrchu leoli plant a phobl ifanc wrth eu craidd. Trwy’n bwrdd cynghori, gall pobl ifanc helpu i bennu pa bynciau polisi rydym yn ymgyrchu arnynt, a siarad gydag Aelodau’r Senedd amdanynt, a gallant helpu i lunio sut mae ein rhaglenni yn gweithredu a sut y dylai gwaith yn y dyfodol ymddangos.
Yr haf diwethaf, cynhaliom gwrs preswyl a ddaeth â phobl ifanc ynghyd i ddysgu am ymgyrchu ac i ddechrau creu cynllun ar gyfer yr ymgyrch y bydd y grŵp yn gweithio arno dros y flwyddyn nesaf. Gwnaethom hefyd wneud caiacio, helfa drysor, a llawer o grefftau a gemau!
Dros y flwyddyn nesaf, bydd y bwrdd cynghori ieuenctid yn cyfarfod unwaith y mis i weithio ar ddatblygu a gweithredu’r ymgyrch. Bydd y cyfarfodydd hyn yn gymysgedd o gyfarfodydd ar-lein ac yn y cnawd.
Cynhyrchwn Ffynnu, cylchgrawn ar gyfer pob person ifanc sydd â phrofiad gofal ledled Cymru. Mae gan bobl ifanc rôl allweddol mewn llunio’r cylchgrawn, gan ddefnyddio’u sgiliau creadigol a’u diddordebau i gyfrannu. Yn y gorffennol, ymgynghorwyd â phobl ifanc ynglŷn â thema pob un cylchgrawn, gan amlygu materion pwysig sydd angen eu cynnwys yn y cylchgrawn, yn ogystal ag ysgrifennu erthyglau, a chyfranogi mewn cyfweliadau.
Gan edrych i’r dyfodol, mae arnom eisiau gwneud Ffynnu hyd yn oed yn fwy hygyrch. I gyflawni hyn, byddwn yn ymgynghori â phobl ifanc am ei gyfeiriad yn y dyfodol.